Question

(உழைப்பே உயர்வு என்ற தலைப்பில் கட்டுரை) - essay on the rise of labour

Answer 1

நாறுது காற்றதென் றெண்ணி தொலைபோவோர் 
மண்வா சமறியா தார் 

தண்ணீர் பற்றாக்குறை சமயங்களிலும், ஒரு சில இக்கட்டான சமயங்களிலும் வயலில் இருக்கும் பயிர்களோடு நாள் கணக்கில் தண்ணீர் தேங்கியிருந்தால் மற்றவர்கள் முகம் சுளிக்கும் ஒரு வாசனை வீசும்.”இது என்ன இப்படிநாறுகிறது” என்று எண்ணி வயல் பக்கம் வராமல், வேறு வழியாகப் போவோர்கள் மண்ணின் மணத்தையும், அதன் வாழ்வையும் அதாவது எல்லாவற்றையும் பொறுத்துக் கொண்டு நல்லதே செய்வதோடு, தான் துர்நாற்றம் வீசினாலும் பரவாயில்லை என்று அது தண்ணீரை தேக்கி வைத்து பயிருக்கு தரும் அதன் வாழ்வையும் அறியாதவர்கள்) 

சேற்று யிராயெனை கண்பார்த்த காலன் 
அவன்கயிறை கைமறந்தான் காண் 

எனது உயிரைப் பறிக்க வந்த எமதர்மர்,சேற்றில் உழன்று வேலை செய்யும் என்னை, விவசாயத்தின் உயிராகவே நினைத்துப் பார்த்து, தான் வீச வந்த இறப்புக்கயிறை என் மீது வீச கைமறந்து, அதை தூர எறிந்து விட்டு, அதே கையாலேயே இங்கு (வயல்வெளியில்) எனக்கு உதவி செய்வார் 

வானக் கதிரளக்கு மெங்கள் பொழுது 
புலரும் மழைவரும் நாள் 

வானத்திலிருந்து வரும் சூரியனின் கதிர்களைப் பார்த்து பொழுதை தெரிந்துகொள்ளும் உழவர்களின் பொழுது, சரியான சமயத்தில் மழை வந்தால்தான் அது அவர்களுக்கு வாழ்க்கை எனும் பொழுது புலர்ந்த நாளாக இருக்கும்.இல்லையென்றால் அது என்றும் துன்பமான கருமையான பொழுதாகவே இருக்கும்). 

தரிசென சோம்பி நிலம்பாரார் வாழ்வென்றும் 
ஆகிடும் பாலையே தான் 

நிலத்தை உழுது மண்ணை இளக்கப்படுத்தி விவசாயத்துக்கு தயார் படுத்தாமல் வேலை செய்ய சோம்பல் கொண்டு நிலத்தில் எதுவும் செய்யாது தரிசாக வைத்திருப்பவனின் வாழ்க்கை செழித்து நிற்கும் வயல் நிலத்தைப் போல் ஆகாது. நிலத்தைப் போல் அவர்களது வாழ்வு விரைவில் பாலையாகும். 

வேண்டும் இனியோர் பிறவி அதிலும் 
உயர்த்திட வேண்டும் வரப்பு 

உலகில் நான் எத்தனை பிறவி எடுத்தாலும் அத்தனை பிறவியிலும் பயிர்த்தொழில் செய்பவனாகவே பிறந்திட வேண்டும். அப்படி பிறந்து, ஏதாவது ஒருவகையில் நீர் வளத்தை பெருக்கி அதன் உயரத்துக்கேற்ப வயல் வரப்பையும், வாய்க்கால் வரப்பையும் உயர்த்தி சிறு குழந்தைகள் முதற்கொண்டு வயதான ஏழைகள் வரை பசி பட்டினியால் உணவில்லாமல் சாகும்நிலைக்கு முற்றுப்புள்ளி வைக்கவேண்டும். வரப்புயர என்று பாடிய அவ்வைப்பாட்டியின் கனவு நனவாக வேண்டும். 

மா,தென்னை காத்திடுவோம் வண்டு வருமுன் 
மறப்பின் தொடரும் துயர் 

வண்டுகள் வருமுன்பே மாமரங்களையும், தென்னை மரங்களையும் காத்துக்கொள்ள வேண்டும். வண்டுகள் வந்துவிட்டால் மாம்பிஞ்சுகளை குடைந்து உள்ளே சென்று மாம்பழங்களின் தரத்தினை அடியோடழித்து விடும். அதே போல் காண்டாமிருக வண்டுகள் என சொல்லப்படும் தென்னை வண்டுகள் தென்னங்குருத்துகளை பாழ்படுத்தி விடும். தென்னம் பாளைகளை தங்கள் கொடுக்குகளால் வெட்டி அதிலிருந்து விவசாயிக்கு கிடைக்கவேண்டிய தேங்காய், இளநீர் மகசூலை அழித்து ஒழித்துவிடும். 

இந்த மா, தென்னை மரங்களை வண்டுகளிடமிருந்து தனிக்கவனம் எடுத்து காக்கவேண்டும். இல்லாவிட்டால் வருடம் முழுதும் கஷ்டப்பட்டும் ஒரு பிரயோசனமும் இருக்காது. 

உழவுக் கணிகலன் ஊடுபயிர் கொல்தல் 
அதின்றேல் அனைத்துமே வீண் 

பயிர்களுக்குள் ஊடாக விளையும் களைப்பயிர்களையும், களைச் செடிகளையும் அகற்றுவதே உழவுக்கும் விவசாயத்தொழில் செய்யும் உழவனுக்கும் அணிகலன். அப்படி களைகளை அகற்றாமல் விட்டுவிட்டால் நாற்றுகளுக்கு செல்லவேண்டிய சத்துகளை இவை உறிஞ்சி வேகமாக வளர்ந்து பயிர்களை அடியோடழித்து விளைச்சலை கெடுத்துவிடும்.அதனால் களைகளையும், வேண்டா ஊடுபயிர்களையும் அழித்து அகற்றி உணவுப்பயிர்கள் விளைச்சல் தர வழிவகை செய்யவேண்டும். அப்படி செய்யாவிட்டால் எல்லாமே வீணாகிப் போய், களைகளே பயிர்களை மேய்ந்து விட்டது என்று கையைப் பிசைந்து மீண்டும் ஒரு முறை கடன் வாங்கி பயிரிட வேண்டியதுதான். அது நேராமல் இருக்க களைகள் மண்ணிலிருந்து வெளிவரும்போதே அழித்துவிடவேண்டும். 

இயற்கை உரமிலாது ஒன்றிலை பூமகள் 
இன்மனம் காணும் வழி 

இயற்கை உரங்களுக்கு இணையானது உலகில் எதுவுமில்லை. இயற்கை உரங்களின்றி மண்மகளின் மகிழ்ச்சியான மனத்தை காண முடியாது. மண்ணின் மகிழ்ச்சியைக் காண ஒரே வழி இயற்கை உரங்களை உபயோகப்படுத்துவதே. இயற்கை உரங்கள் எந்த கெடுதலும் ஏற்படுத்தாமல் பயிர்களுக்கு இயற்கையான முறையில் செழிப்பை தந்து விளைச்சலை தந்து அதை உண்ணும் நமக்கும் எந்த ஒரு பக்க விளைவுகளையும் ஏற்படுத்தாத உன்னதம். மண்ணை மட்டுமல்ல இந்த இயற்கை உரங்கள் மனிதனையும் ஆரோக்கியமாக இருக்கவைக்கும் வல்லமை கொண்ட்து. 

வற்றிடும் கேணிநீர் காண அழும்நெஞ்சம் 
வற்றியபின் வாழுமோ வாழ்வு 

கிணற்று நீர் நாளுக்குநாள் வற்றி வருவதைப் பார்த்து கண்ணீரும் வற்றிப்போக அழும் உழவன் நெஞ்சம், அந்த கிணற்றுநீர் முழுதும் வற்றிப் போனால் அத்தோடு அவன் வாழ்வும் முடிந்துபோகும். பிறதொழில் ஏதாவது தேடவேண்டிய நிலை வரும். படித்திருந்தால் ஓரளவாவது பிழைக்கலாம். அதுவும் கல்வியறிவு இல்லாத உழவன் நிலை என்றால் தற்கொலை செய்து குடும்பமாக உயிர்மாய்க்கும் அதோ கதிதான். 

மண்வெட்டி பார்த்து மடையை திறப்பின் 
பயிர்க்கும் உயிருக்கும் நன்று 

மண்வெட்டியின் பிடியையும் அதன் உலோகத்தாலான மண்ணெடுக்கும் அடிப்பாகத்தையும் ஒரு முறை உற்றுப் பார்த்தபின் மடையைத் திறக்கவேண்டும். அப்படி எதையும் பார்க்காது சட் சட் என்று மடையைத் திறந்திட முயன்றால் ஒருவேளை உடைந்த நிலையில் இருக்கும் அதன் உலோக அடிப்பாகம் மடையைத் திறக்க முனையும் போது நம் மண்டையை தாக்கலாம். மரத்தாலான கைப்பிடி கழன்று காயப்படுத்தி, இரத்த இழப்பையும் ஏற்படுத்தலாம். இந்த சூழ்நிலையில் சரியாக வெட்டப்படாத மடை நீர் , பாய்ந்த வயலுக்கே பாய்ந்து பயிர்களை அழுகச்செய்துவிடும். ஆகவே மண்வெட்டியின் பிடி, அடி பார்த்து மடை திறந்தால் பயிர்களுக்கும். உழவனின் உயிருக்கும் நல்லது 

எந்த உழைப்பானாலும் சரி அதை 100 மடங்கு மரியாதையோடு நேசித்து செய்வோம். அது நிச்சயம் நம்மை உயர்த்தும். 

Answer 2

Answer:

this may help u

Explanation:

உழைப்பே உயர்வு தரும் கட்டுரை

குறிப்பு சட்டகம்

முன்னுரை

உழைப்பின் சிறப்பு

உழைப்பால் உயர்ந்தவர்கள்

உழைப்பின் முக்கியத்துவம்

முடிவுரை

முன்னுரை

“தெய்வத்தான் ஆகாதெனினும் முயற்சிதன் மெய்வருத்தக் கூலி தரும்” என்கின்றார் வள்ளுவர்.

அதாவது முன்வினையால் ஒரு காரியம் நடைபெறாமல் போனாலும் தனது உடலை வருத்தி உழைக்கும் போது அதற்கான பலன் கிடைக்கும் என்பதே இதன் பொருள் ஆகும்.

நாம் முயற்சியுடன் உழைக்கும் போது வெற்றி நமக்கு கிடைத்தே தீரும்.

வள்ளுவர் மட்டுமல்லாது ஒளவையார், விவேகானந்தர் போன்ற பலரும் உழைப்பை பற்றி கூறியுள்ளனர்.

இந்த கட்டுரையில் உழைப்பே உயர்வு தரும் என்பதை விரிவாக பார்க்கலாம்.

உழைப்பின் சிறப்பு

கடின உழைப்பு அனைவருக்கும் சிறப்பையே தரும். நாம் வாழுகின்ற சூழலை உற்று நோக்கினால் ஒவ்வொரு உயிரினத்திடம் இருந்தும் கடின உழைப்பை கற்றுக் கொள்ளலாம்.

தேனீக்களும் சிலந்திகளும் கடின உழைப்பிற்கு மிகச்சிறந்த உதாரணமாக கொள்ளப்படுகின்றன.

சிலந்தியின் வலை எத்தனை முறை கலைக்கப்பட்டாலும் மீண்டும் தனது வலையை பின்னி வாழும் திறமை கொண்டது.

தேனீக்கள் சிறியளவு தேனை சேகரிக்க 16 மைல் தூரம் வரை பயணம் செய்து கடினமாக உழைக்கின்றன.

உழைப்பு எனப்படுவது ஒவ்வொருவரிற்கும் அளிக்கப்பட்ட வேலையை முழுமுயற்சியுடன் செய்தல் ஆகும்.

உழைப்பில்லாமல் உயர்வு இல்லை. ஒருவர் எந்தளவிற்கு கடினமாக உழைக்கின்றாரோ அந்தளவிற்கு உயர்ந்த நிலையை அடைய முடியும்.

வேலை செய்பவர்கள் அவர்களது வேலையை முழுமுயற்சியுடன் செய்தால் மட்டுமே உயர்ந்த இடத்தை பெற முடியும். மாணவர்கள் கடினமாக படித்தால் மட்டுமே பரீட்சையில் சித்தி அடைய முடியும்.

ஒரு மனிதன் தனது வாழ்நாளில் பத்தாயிரம் மணிநேரம் கடினமாக உழைத்தால் தனது துறையில் உன்னதமான இடத்தை அடைந்து விடலாம் என அறிஞர்கள் குறிப்பிடுகின்றார்கள்.

இதுவே உழைப்பின் சிறப்பு ஆகும்.

உழைப்பால் உயர்ந்தவர்கள்

இந்த உலகத்தில் கடின உழைப்பால் உயர்ந்தவர்கள் பலரை குறிப்பிடலாம். அவர்களுள் தோமஸ் அல்வா எடிசன், ஆபிரகாம் லிங்கன், அப்துல் கலாம் போன்றோர் குறிப்பிடத்தக்கவர்களாவார்.

கண்டுபிடிப்புக்களின் தந்தை என்று அழைக்கப்படுகின்ற தோமஸ் அல்வா எடிசன், கடின உழைப்பிற்கு சிறந்த உதாரணமாக கூறக்கூடியவர்.

மின்குமிழைக் கண்டு பிடித்த தோமஸ் அல்வா எடிசன், மின்குமிழ்கள் நீண்ட நேரம் எரிவதற்கான சரியான மின்னிழையை கண்டறிவதற்காக கிட்டத்தட்ட ஜந்தாயிரம் இழைகளை பரிசோதித்தும் தோல்வியையே தழுவினார்.

பின்னர் விடாமுயற்சியுடன் கடினமாக உழைத்து சரியான இழையை கண்டுபிடித்து உலகத்தையே வியப்பில் ஆழ்த்தினார்.

கடின உழைப்பிற்கு இன்னொரு எடுத்துக்காட்டாக விளங்குபவர் ஆபிரகாம் லிங்கன்.

செருப்பு தைக்கும் தொழிலாளியின் மகனான இவர் தொடர் தோல்விகளால் மனந்துவண்டு போகாமல் கடினமாக உழைத்து அமெரிக்காவின் மிகச் சிறந்த ஜனாதிபதி ஆனார்.

இந்தியாவின் முன்னாள் குடியரசு தலைவரான அப்துல் கலாம் சிறுவயதில் பத்திரிகை விற்பது போன்ற சிறு தொழில்களை செய்து வாழ்வில் முன்னேறியவர்.

ஒரு நபர் அடித்தட்டு மனிதராய் பிறந்து சாதனையாளராய் மாற வேண்டுமாயின் அவர் மிகவும் கடினமாக உழைத்தாக வேண்டும்.

இவர்கள் அனைவரும் வரலாற்றில் உயர்வாக போற்றப்பட காரணம் அவர்களின் கடின உழைப்பே ஆகும்.

உழைப்பின் முக்கியத்துவம்

ஒருவர் வாழ்க்கையில் வெற்றி பெற்று மிகச்சிறந்த இடத்தை அடைய வேண்டுமாயின் அவர் தான் இப்போது மேற்கொள்கின்ற பணிகளை மிகுந்த அர்ப்பணிப்புடனும் கடின உழைப்புடனும் மேற்கொள்ள வேண்டும்.

சிலவேளைகளில் எமது ஒவ்வொரு முயற்சிகளும் தோல்வியை தழுவினாலும் நாம் மேலும் கடினமாக முயலும் போது இறுதியில் அவை வெற்றியையே பெற்றுத்தருகின்றன.

எமது குறிக்கோள்களை மட்டும் கவனத்தில் கொண்டு அதீத முயற்சியுடனும் பொறுமையுடனும் உழைத்தால் வெற்றி எனும் சிகரத்தை அடைந்து விடலாம்.

ஆறறிவு உடைய மனிதர்களுக்கும் சரி, ஜந்தறிவு உடைய உயிரினங்களும் சரி ஒவ்வொருவரிற்கும் உழைப்பு மிக முக்கியமானதாகும்.

முடிவுரை

நூறு பேரை விட சிறந்தவராக விளங்க வேண்டுமென நீங்கள் நினைத்தால் ஏனைய தொண்ணூற்றொன்பது பேரை விட நீங்கள் கடினமாக உழைத்தாக வேண்டும்.

உழைப்பில்லா பிறப்பு இறப்பிற்கு சமம் என்று குறிப்பிடுகின்றார்கள். மனிதராய் பிறந்த ஒவ்வொருவரும் சோம்பல்தனத்தை கைவிட்டு கடினமாக உழைத்தால் மட்டுமே வையகத்தில் வாழ்வாங்கு வாழ முடியும்.

கடின உழைப்பு ஒருவரை சிறப்பான பாதைக்கே இட்டு செல்லும். எனவே கடின உழைப்பை மூலதனமாக இட்டு வாழ்வின் உயர்ந்த இடத்தை அடைவோம்.